Rohangan Hadits
AMAL ANU PALING
DIPIKACINTA KU ALLAH
Aisyah ra sasauran: ”Rasulullah saw kagungan amparan anu sok ditilepkeun
tipeuting jadi sajadah, teras shalat dina éta amparan, sarta lamun ti beurang
éta amparan dianggo calik ku Nabi saw tapi jalma-jalma ogé sok paheula-heula
marilu diuk sareng Nabi saw terus shalat berjama’ah dina éta amparan dugika anu
sholat beuki loba sarta teu katampung. Anjeunna ngadawuh: ”Hé sakumna manusa
prak geura milampah amal téh luyu jeung kamampuhan aranjeun sarta sing mayeng,
satemenna Allah swt moal bosen narima amal aranjeun anging lamun aranjeun geus
bosen. Amal-amal anu paling dipikacinta ku Allah mah nyaéta amal anu
ngeureuyeuh (mayeng) sok sanajan saeutik. *** (H.R. Al-Bukhari ti
Aisyah ra)
A.Syarah Mufrodat.
Aisyah ra sasauran:”Kâna lirusuulillah hashîrun Rasulullah saw
kagungan amparan, wa kaana yahjuzuhu billaili fayushalli ‘alaihi anu sok ditilepkeun tipeuting éta amparan jadi
sajadah teras shalat dina éta amparan, wayabsuthuhu binnahaari sarta
lamun tibeurang éta amparan diparaké diuk ku Nabi saw, faja’alannaasu
yatsuubuuna ilannabiyyi tapi jalma-jalma ogé sok paheula-heula marilu diuk
sareng Nabi saw, fayushalluuna bisholaatihi hatta katsuruu terus shalat
berjama’ah dina éta amparan dugika anu sholat beuki loba sarta teu katampung. Faaqbala
‘alaihim faqoola: Nabi saw ngadawuh ka para shahabat: ”Yaa ayyuhannaasu!
Hé sakumna manusa, hudzuu minala’maali maa tuthiiquuna prak geura
milampah amal téh luyu jeung kamampuhan aranjeun sarta sing mayeng, fainnallaha
laa yamillu hatta tamilluu satemenna Allah swt moal bosen narima amal
aranjeun anging lamun aranjeun geus bosen. Wa inna ahabba la’maali ilallahi
Satemenna amal-amal anu paling dipikacinta ku Allah swt mah nyaéta, maa
daama wa in qolla amala anu ngeureuyeuh (mayeng) sok sanajan saeutik.
Baca oge : AMALIAH ANU NGABUAH BAROKAH
B.Syarat Matan.
Imam Bukhari nyimpen éta hadits dina bab Allibâs anu aya pakaitna
jeung perlengkapan kaabus pakéan anu
dipaké nalika ngalaksanakeun shalat. Aya sababaraha istinbat tina matan hadits
di luhur, diantarana:
1. Rasulullah saw kagungan amparan serba guna, peuting ditilepkeun atawa dileutikeun
saperti sajadah dipaké shalat peuting sarta ti beurang mah dipaké ngariung
jeung para shahabat sarta sakapeung éta amparan jadi parebutan diparaké shalat
saperti parebutan tempat shalat di raudloh. Teu aya halangan lamun urang boga
karpét atawa samak mendong serba guna, bisa dipaké shalat, ngariung atawa
tempat saré anu penting dijaga kabersihanana.
2. Sumanget para shahabat pikeun shalat berjama’ah jeung Nabi saw ulah
belang-betong, édan-éling lolobana édan tapi kudu mayeng ulah bosenan.
3. Dina ahir dawuhan Nabi saw ngamotivasi sangkan mayeng dina ngalaksanakeun
amal soléh sok sanajan saeutik. Lamun dina diajar mah ulah kawas obor
barangbang, sakeudeung hurungna ka dituna mah pareum. Ulah berapi-api tapi
berair-air. Cikaracak ninggang batu laun-laun jadi dekok.
4. Numutkeun téori NLP pikeun ngawangun
kabiasaan anu hadé, urang kudu ngarobah heula mind set atawa pola pikir anu
nyoko kana paréntah agama jeung kayakinan anu kuat. Lamun hayang shalat di awal
waktu nya kudu latihan minimal dua poé 10 kali shalat kudu di awal waktu teu
meunang kabeurangan. Mimiti mah bakal beurat tapi sanggeus ka 7 kali Insya Allah
ringan. Bisa lantaran biasa. Urang biasakeun hudang janari shalat
Tahajud terus maca al-Qur’an sapuluh ayat, saméméh subuh mandi heula, shodaqoh
routin, bayar listrik telepon ulah disérédkeun ka tanggal 20 tapi diprogram
supaya teu beurat. Man jadda wa jada = nu keyeng pasti pareng.
Cag! ***
Drs. H. Uu Suhéndar,
M.Ag.
(Déwan Redaksi Bina Da’wah)
Majalah Bina Da'wah Nomer 485
