KOMUNIS-Athéis sacara kalembagaan jelas geus taya dikieuna. Kalah kumaha waé ogé TAP MPR Taun 1965 lumaku kénéh. Jeung deui rada hésé pikeun dihirupkeun deui sacara organisasi partéy mah. Tapi anu kudu jadi ingetan urang, Komunis téh idiologi. Teu sarua jeung Islam. Islam mah lain idiologi, tapi wahyu anu mangrupa akidah atawa kayakinan anu hakiki. Wahyu datangna ti Maha Pencipta, nyaéta Allah SWT, ari idiologi mah datangna tina pikiran manusa.
Komunis téh idiologi. Mémang hésé pikeun dipupusna lamun jalma geus
asup kana idiologi. Lamun dihubungkeun jeung akidah Islam baris aya patalékan,
“Saha Tuhan (Pangéran) manéhna anu sabenerna?” Jadi kaliru upama aya anu nyebut
“Komunisi tidak ber-Tuhan” téh. Komunis “ber-Tuhan”, boga Pangéran. Ari Tuhan
maranéhna mah taya lian “Hawa Napsu” maranéhna. Maranéhna téh Fir’aun Modéren. Urang
Komunis téh “Pelanjut Fir’aun” alias Fir’aun Gaya Baru.
Fir’aun apan ngaku Pangéran, Komunis ogé ngaku Tuhan (Pangéran), ngan
teu dikedalkeun. Ngan numutkeun Al-Qur’an maranéhna téh nutur-nutur “Hawa
Napsu”na. Naon-naon numutkeun kahayangna katut kanyaho maranéhna, éta anu
bener. Nya éta anu disebut Ahéisme, Marksisme, Léninisme jeung sajabana. Maranéhna
ditolak, ku sabab kayakinanna syirik, nya Komunis disebut Musyrik, katut
lampahna kufur, nya maranéhna disebut Kafir. Dina kahirupanna sapopoé maranéhna
nolak agama naon waé, utamana Islam, sarta nolak ayana Pangéran, Allah SWT.
Gerakan Komunis moal eureun nepika qiyamah. Sabab maranéhna teu
satuju, teu resep, ijid, ceuceub kana agama, utamana Islam. Jadi maranéhna téh
taya lian “Kepanjangan Tangan” ti Yahudi jeung Nashroni ogé. Al-Qur’an sakitu jéntréna
apan mépélingan umat Islam. “Jeung moal
mikaridlo ka anjeun urang Yahudi katut urang Nashroni, nepika anjeun
nutur-nutur tapak-lacak maranéhna.” Teu kungsi eureun apan maranéhna
merangan urang Islam, nepika urang tunduk.
Gerakan Komunis aya dina sagala segi kahirupan. Stratégi aranéhna
ngamangpaatkeun atawa ngagunakeun sagala kakuatan anu nyampak, kayaning élmu-pangaweruh,
téknologi jeung sajabana. Jadi upama Komunis gerakanna disebut “Gerakan Di
Bawah Tanah”, hartina Komunis téh henteu gerak saperti partéy. Maranéhna nyusup
kana sagala segi kakuatan anu nyampak. Kana ékonomi, sékulér, kapitalis,
sosialis. Dina widang politik hésé pisan pikeun ngaleungitkeun sugak-sogok.
Dina widang pendidikan nepika kiwari beuki jauh tina akidah Islam.
Kurikulumna teu kagambar sinérgis antara élmu séjénna jeung akidah. Sabab
anggapanna, ieu élmu agama, éta élmu umum. Éta anu kudu dikelirkeun di nagara
Pancasila ieu. Lamun mémang bener nagara Pancasila ieu arék atawa hayang konsékwén,
nya kudu ditatapakan ku Ketuhanan Yang Maha Esa. Dina Empat Pilar MPR apan
disapukan, yén Ketuhanan Yang Maha Esa tafsirna dipasrahkeun ka agama
masing-masing. Agama masing-masing téh apan boga Kitab Suci. Islam boga
Al-Qur’an, Kristen boga Al-Kitab.
Teu bisa disaruakeun antara Al-Qur’an jeung Kitab Suci lianna. Tah
harti silih hormat téh kitu. Kiwari mah disasarkeun. Lain silih hormat, tapi
kudu silih tarima. Nepika cikénéh apan menag “ngaku” kana agama Baha’i. Baha’i
apan aliran sasar anu pasalia jeung akidah Islam. Kuduna mah konsékwén. Lamun
manéhna ngaku agama Baha’i, pék téh teuing. Tapi upama manéhna ngaku agama Islam
bari aliranna saperti kitu, éta hartina sasar. Jadi kudu dikelirkeun ogé.
Tah anu kararitu téh dimangpaatkeun ogé ku urang Komunis. Ulah dikira
teu dimangpaatkeun. Ahirna perpecahan téh terus lumangsung apan. Perbédaan anu
seukeut terus lumangsung. Jadi lain perbédaan paham, tapi penyimpangan. Tah anu
dilarapkeun ku maranéhna téh penyimpangan, lain perbédaan paham. Da ari perbédaan
paham mah ti baheula ogé geus biasa. Perbédaan paham mah ti jaman Nabi SAW
jeung para shahabat RA ogé geus aya tur geus biasa.
Saterusna Konsép Hak Azasi Manusia (HAM) anu terus diagung-agungkeun
ku maranéhna téh. Lamun geus nyaritakeun HAM nepi ka qiyamah ogé moal patepung.
Sabab saban jalma boga HAM. Jadi kudu aya standar anu disebut HAM téh. Ulah
nepika HAM batur ngarempak HAM urang, atawa sabalikna. Contona mah saperti
kasus Si Kécé cikénéh. Si Kécé nyarita anu teu bener, pajahkeun HAM. Antukna,
lamun manéhna aya anu neunggeul ogé bisa disebutkeun HAM. Tah, urang-urang
Komunis téh nyalindung ogé dina anu katelah HAM. *** (Ki Udin/BD)
Cék Inohong: BD nomor 493
H. M. Daud Gunawan, S.E.(Ketua Majelis Syuro Déwan Da’wah Jabar)
Baca oge :