Cék Inohong Bina Da'wah Nomor 488:
Prof. DR. KH. Miftah Faridl (Pupuhu Déwan Redakasi Bina Da’wah)
KASÉHATAN JEUNG KAIMANAN
PAKAIT sareng sasih Ramadlan taun ieu, upami ningal
kondisi, sapertosna sasih Romadlon ayeuna masih sapertos taun kamari. Kagiatan umat
Islam pasti bakal diwatesanan. Namung tong janten halangan kanggo kaom Muslim
ngajalankeun ibadah, margi sasih Romadlon téh bulan ka masjid, bulan ibadah, bulan shodaqoh sareng bulan
itikaf. Nu penting mah urang tetep ngajaga tur merhatoskeun protokolér kaséhatan. Atuh salajengna mah tawakal wé ka Alloh SWT.
Program-program anu loyog diayakeun ku masjid-masjid dina danget ieu diantawisna: Kagiatan
Romadlon patali sareng tabligh parantos mahabu di mana-mana. Umat ayeuna mah
anu peryogi disalametkeun téh kondisi ékonomina. Palebah dieu masjid kedah hadir. Masjid kudu
jadi pelopor hudangna ékonomi umat.
Program-program anu sipatna pangwangunan fisik samentara dieureunkeun heula,
dialihkeun kana pangwangunan ékonomi umat.
Jama’ah anu butuh modal usaha, masjid ngusahakeun ngamodalan. Carana mah bisa
ti kas masjid atawa masjid ngahubungkeun ka para aghnia anu bisa méré tulung jama’ah
masjid séjén anu
ngabutuhkeun. Kitu ogé jama’ah anu
butuh biaya sakola budak atawa pikeun uubar. Ku sasalad ieu téh anu jadi korban pangréana mah umat Islam. Karana karéréaan umat
Islam Indonésia status ékonomina menengah ka handap. Da jelema beunghar mah sisimpenanna
ogé miliyaran-triliunan. Maranéhna mah saukur ngurangan kauntungan tina usahana.
Nu tong dipopohokeun ogé, masjid kudu
mikiran para ustadz anu akibat sasalad sabaraha kajian aranjeunna dieureunkeun.
Para ustadz anu ngandelkeun panghasilan ti masjid ka masjid arang aya anu
mikiran. Palebah dieu masjid anu geus maju ékonomina kudu ngabantu aranjeunna. Naha nyieun satgas
husus pikeun ngabantu asatidz, tong nepika aranjeunna kalaparan atawa kasulitan
nyakolakeun barudakna. Sabab pasti asatidz anu qonaah mah moal ménta enya ogé maranéhna butuh ku pitulung urang. Urang kudu yakin kana
kasauran Rasul SAW sapertos anu kaunggel dina H.R. Muslim: “Saéstuna Alloh bakal nulung hamba-Na,
lamun éta hamba daék nulung dulurna.”
Anapon cara umat Islam pikeun nyegah sasalad
Covid-19 taya lian protokol kaséhatan kudu dibarengan jeung
protokol kaimanan. Kaumuman ti urang geus apal kana aturan protokol kaséhatan; maké masker, hand sanitizer, tur ngajaga
anggang; tapi sok poho ka protokol kaimanan. Protokol kaimanan malah anu éféktif naékkeun daya tahan awak. Ku iman ka
Alloh SWT bakal ngadatangkeun katenangan, daya tahan awak bakal naék dina kaayaan tenang. Dina bulan Romadlon ieu umat Islam
ngajalankeun sholat, shoum, tur ibadah-ibadah séjénna, muga-muga ngadatangkeun
katenangan tur naékkeun daya
tahan awak sakumna kaum Muslim. *** (Suryawan/BD)