Rohangan Tafsir:
LALAKON KULAWARGA ‘IMRON (3)
فَنَادَتْهُ
الْمَلاَئِكَةُ وَهُوَ قَآئِمُُ يُصَلِّي فِي الْمِحْرَابِ أَنَّ اللهَ
يُبَشِّرُكَ بِيَحْيَ مُصَدِّقًا بِكَلِمَةٍ مِّنَ اللهِ وَسَيِّدًا وَحَصُورًا
وَنَبِيًّا مِّنَ الصَّالِحِينَ {39} قَالَ رَبِّ أَنَّى يَكُونُ لِي غُلاَمُُ
وَقَدْ بَلَغَنِيَ الْكِبَرُ وَامْرَأَتِي عَاقِرُُ قَالَ كَذَلِكَ اللهُ يَفْعَلُ
مَايَشَآءُ {40} قَالَ رَبِّ اجْعَل لِّي ءَايَةً قَالَ ءَايَتُكَ أَلاَّ
تُكَلِّمَ النَّاسَ ثَلاَثَةَ أَيَّامٍ إِلاَّ رَمْزًا وَاذْكُر رَّبَّكَ كَثِيرًا
وَسَبِّحْ بِالْعَشِيِّ وَاْلإِبْكَارِ {41}
Terus Malaikat ngagero Zakaria nalika
anjeunna masih kénéh nangtung bari sholat di Mihrob bari pok nyarita: ”Satemenna Allóh maparin kabar gumbira ka anjeun ku hiji turunan anu
ngaran Yahya nu ngabenerkeun kalimah Allóh, jadi panutan umat, bisa nahan
diri jeung jadi Nabi ti golongan jalma-jalma soléh (39) Nabi Zakaria
nyarita: ”Ya Allóh mana mungkin abdi gaduh putra padahal abdi tos kaabus lansia
bari pun bojo mandul? Allóh ngadawuh: “Allóh midamel naon anu dikersakeun ku
Mantenna (40) Nabi Zakaria nyarita: ”Ya Allóh! Paparin tanda kanggo abdi. Allóh
ngadawuh: ”Tanda pikeun anjeun nyaéta anjeun teu nyarita jeung papada manusa
tilu poé anging ku basa isyarat. Jeung prak geura sebut asma Allóh
saloba-lobana bari prak geura tasbih di waktu soré jeung isuk (41).
A.Tafsir Mufrodat.
1. Fanâdathu almâikatu terus
Malaikat Jibril ngagero ka Nabi Zakaria, wa huwa qóimun nalika anjeunna masih kénéh nangtung yusholli bari sholat filmihrobi di Mihrob, bari pok éta Malaikat nyarita: ”Annallóha satemenna Allóh yubasysyiruka maparin pangbubungah
ka anjeun biyahya ku hiji turunan anu ngaran Yahya, mushaddiqon
bikalimâtiminallóh nu ngabenerkeun kalimah Allóh, wa
sayyida jadi panutan umat, wahashûra bisa nahan diri tina syahwat wa
nabiyyamminashshólihîn jeung jadi Nabi ti golongan
jalma-jalma soléh (39).
2. Qóla Robbi anna yakûnu lî gulâmun Nabi Zakaria nyarita: ”Ya Allóh
mana mungkin abdi gaduh putra waqod balaghonialkibaru padahal abdi tos kaabus lansia
anu ceuk pertimbangan akal mah pamohalan gaduh putra wa kânatimroati âqirun
bari pun bojo ogé mandul nu ceuk pertimbangan akal mah mustahil kagungan putra?
Qóla Allóh ngadawuh: ”kadzalikallóhu yaf’alu maayasya, tah kitu Allóh midamel naon anu dikersakeun ku Mantenna,
di payuneun Allóh teu aya hal anu mustahil (40).
3. Qóla Rabbij’allî âyatan Nabi Zakaria nyarita: ”Ya Allóh!
Paparin tanda kanggo abdi sangkan abdi langkung yakin kana éta kabar gumbira. Qóla Allóh ngadawuh: ”Ăyâtuka tanda pikeun anjeun
nyaéta allâtukallimannâsa anjeun teu bisa nyarita masalah
kadunyaan jeung papada manusa tsalâtsata ayyâmin salila tilu poé illa romzan
anging ngagunakeun basa isyarat. Wadzkur robbaka jeung prak
geura sebut asma Allóh sing loba dzikir katsiro saloba-lobana wa
sabbih bari prak geura tasbih ngamahasucikeun Allóh bil’asyiyyi di
waktu soré walibkâr eung isuk (41).
B.Tafsir Ayat.
1. Dina ayat saméméhna ngajelaskeun
jumeritna Zakaria hayang boga turunan soléh saperti Maryam anu dipaparin
kaonjoyan ku Allóh SWT bari harita umur Zakaria geus nincak 120 taun istrina
umur 90 taunan bari jeung mandul anu ceuk pertimbangan élmu kadokteran mah
mustahil bakal boga turunan. Nabi Zakaria teu pegat harepan sok sanajan ceuk
tetempoan akal moal mungkin boga turunan tapi Allóh kagungan kakawasaan anu
ceuk pertimbangan akal teu mungkin tapi dipayuneun Allóh mah teu aya hal anu
mustahil.
2. Dina ayat 39 ngeusi dikabulkeunana
du’a Zakaria anu langsung diijabah ku Allóh SWT ngaliwatan malaikat Jibril
saméméh Zakria réngsé tina sholatna. Kabar gumbira anu luar biasa ngabéwarakeun yén anjeunna bakal dipaparin putra lalaki anu ngaran Yahya anu
hartina hirup jeung ngahirupkeun anu boga tilu sipat sampurna nyaeta:
a. Sayyida, anu jadi panutan
jeung idola anu bakal dituturkeun laku lampahna ku umatna.
b. Hashûra, anu bisa nahan
syahwat ka istri jeung kahirupan dunya séjénna.
c. Wa nabiyyaminasâlihîn,
digolongkan ka kolompok nabi anu saroléh.
3. Kabungah Zakaria anu luar biasa nepi
kedal ucap: ”Ya Allóh paparin tanda wiréhna abdi leres bakal dipaparin putra. Allóh
maparin tanda yén Zakaria teu bisa komunikasi jeung papada manusa salila tilu
poé tilu peuting teu kaluar sora tapi ngagunakeun basa isarat. Sok sanajan taya
soraan tapi nalika dzikir ka Allóh mah kaluar sora. Nabi Zakaria diparéntah
sujud syukur jeung dzikir soré jeung isuk anu hartina ti soré nepi ka isuk
sarta ti isuk nepi ka soré.
4. Urang kiwari anu nyanghareupan
bangbaluh hirup anu kacida pisan beuratna, komo tos lebaran mah loba anu
daratang nagih hutang bari awak gering poma ulah putus asa pikeun ihtiar
jeung ngadu’a ka Allóh Nu Maha Kawasa. Sok sanajan ceuk dokter divonis umur
ngan tilu poé atawa panyakit taya ubarna, Insya Allóh anu nyageurkeun mah lain ubar
atawa dokter tapi Allóh anu kagungan kakawasaan pikeun nyageurkeun atawa
ngamaotkeun hiji jalma. Aya kalana pasén anu divonis tilu poé nyawana ku dokter
malah dokter anu maot ti heula lantaran mulang ngantor ditubruk angkot.
